"Dövlətin idarəetməsində olan şirkətlər korrupsiya, "otkat" və "şapka" yuvasıdır" - NATİQ CƏFƏRLİ

""Azərenerji" ASC 2018-ci ili 307 milyon 335 min manat zərər ilə başa vurub, 2017-ci ili 602 milyon 873 min manat zərər ilə bağlamışdı. Yəni, 2017-18-ci illərdə "Azərenerji"nin zərəri 1 mlrd. manata yaxın olub. ASC-nin bu günə cəmi öhdəlikləri 2 mlrd. 527 mln. 840 manatdır ki, bunun da 1 mlrd. 707 mln. manatı, yəni, təqribən 1 mlrd. dolları kredit borclarıdır".Hurriyyet.org xəbər verir ki, bu fikirlər Respublikaçı Alternativ Partiyasının (REAL) icra katibi, iqtisadçı ekspert Natiq Cəfərliyə məxsusdur.

"Azərenerji"nin büdcədən hər il böyük miqdarda dotasiya aldığını vurğulayan REAL-ın icra katibinin sözlərinə görə, son iki ildə aldığı subsidiyanın miqdarı 196 mln. manatdır: "Keçən il büdcəyə ödədiyi verginin həcmi isə cəmi 27 mln. manatdır. Yəni ASC digər dövlət şirkətləri kimi rəsmən büdcəni minib-çapır.
"Azərenerji"nin nədən ziyanla işlədiyini bilmək üçün keçmiş və indiki rəhbərliyinin villalarını, evlərini, obyektlərini, maşınlarını, taxdığı saatları görmək kifayətdir. Dövlətin idarəetməsində olan bütün şirkətlər bərbad gündədir, korrupsiya, "otkat" və "şapka" yuvasıdır".

Ekspertin fikrincə, ASC-lər, QSC-lər ya tam, ya qismən özəlləşdirilməli, ya da uzunmüddətli müqavilələr ilə normal özəl şirkətlərə idarəetməyə verilməlidir: "Amma müqavilələr hər addımbaşı pozulmamalı, biznesə qanuni güvən verilməli, ədalətli məhkəmə sistemi təsis edilməlidir. Yoxsa yetim Arabulun taleyini heç kim yaşamaq istəməz".