General-leytenant Hüseyn Rəsulbəyov-100 

Azərbaycan tarixində həyat yolu  işıqlı,parlaq,ləkəsiz olan yüzlərlə görkəmli şəxsiyyətlər var ki, neçə onilliklər keçsə də, o insanların şərəfli ömür yolu, özlərindən sonra qoyub getdikləri nəcib işləri saysız-hesabsız yetirmələri tarixdə silinməz izlər buraxır, adları  xalqımızın  milli quruculuq tarixinə qızıl hərflərlə yazılır. Bu unudulmaz insanlardan biri də artilleriya general-leytenantı, uzun illər Azərbaycanın rabitə naziri vəzifəsində çalışmış Hüseyn Cümşüd oğlu Rəsulbəyovdur.

        Azərbaycanın  orta və yaşlı nəsli bu tələbkar,  əsl zabit kimi sərt, lakin bir o qədər də  ürəyiyumşaq, qayğıkeş və ədalətli insan olan Hüseyn Rəsulbəyovu yaxşı xatırlayır.  1917-ci il iyunun 26-da  qədim türk  torpağı olan Dərbənddə poçt məmurunun ailəsində dünyaya göz açan  Hüseyn Rəsulbəyov keşmə -keşli həyat yolu keçdi, tale onu bir çox sınaqlara çəkdi.O, 1932 -ci ildə  o vaxtkı Orconikidze şəhərində Politexnik Texnikumuna daxil olur. Burada təhsilini başa vurduqdan sonra bir müddət Şimali Qafqaz Dəmiryolunun Mineralnıye Bodı stansiyasında mexanik işləyir.  1936-cı ildə Leninqrad Siqnalizasiya və   Rabitə Mühəndisləri  Elektrotexnika İnstitutuna daxil olur.İnstitutu bitirdikdən sonra isə o, F.Dzerjinski adına Qızıl Ordu  Artilleriya Akademiyasının dinləyicisi olur. 1941-ci ildə Akademiyanı başa vuran Hüseyn Rəsulbəyov Odessa şəhərindəki  Primorsk Qoşunlar  Qrupuna göndərilir. Müharibəni də elə burada hava hücumundan müdafiə (HHM) qoşunlarının 15-ci briqadasının mühəndisi kimi qarşılayır. Müharibənin sonunda isə artıq  gənc zabit Zaqafqaziya cəbhəsinin 99-cu HHM diviziyasının  artilleriya üzrə rəisi idi. 1960-62-ci illərdə mühəndis-texniki xidməti general-mayoru olan Hüseyn Rəsulbəyov Bakı Hava Hücumundan Müdafiə Dairəsi qoşunlarının zenit-artilleriya komandanının müavini, 1966-1975-ci illərdə isə komandanı vəzifəsində yüksəlir. 1968-ci ildə nümunəvi xidmətlərinə görə Hüseyn Rəsulbəyova  "artilleriya general -leytenantı " ali hərbi rütbəsi verilir. 

      Hüseyn Rəsulbəyov   orduda olarkən özünün biliyi,təcrübəsi, nüfuzu və qayğıkeşliyi  insanlara  xüsusən də azərbaycanlı kadrlara daim qayğısı ilə yadda qalır. İllər sonra istefada olan artilleriya general-polkovniki Tofiq Ağahüseynov Rəsulbəyov  xarakterindən söz açarkən deyir: "Çeneral-leytenant Hüseyn Rəsulbəyov  Bakı Hava Hücumundan Müdafiə  Dairəsinin zenit-raket qoşunlarının komandanı idi. O, mənə çox kömək göstərib. Rəsulbəyov dairə qərargahında işləyirdi, komandan idi, mən isə əvvəlcə polk, sonra diviziya və korpus komandiri oldum. O, hər zaman məni mümkün xoşagəlməz hadisələrlə bağlı xəbərdar edir, qoruyurdu, bu və ya digər şəraitdə necə hərəkət etmək lazım olması barədə məsləhətlər verirdi. Bunun üçün mən ona çox minnətdaram."

        Uzun illər general-leytenant Hüseyn Rəsulbəyovla birlikdə işləmiş Bakı Hava Hücumundan Müdafiə Dairəsi Qoşunlarının komandanı, general-polkovnik Fyodor Akimoviç Olifirov yazırdı: "Bəzən elə olur ki, hətta böyük rəhbərlər belə passiv olurlar, vəzifələrinə uyğun  təşəbbüs göstərmək əvəzinə, heç nəyə həvəs göstərmirlər. Amma Hüseyn Cümşüdoviç heç vaxt  heç kimdən hər hansı bir xatırlatma və ya tapşırıq gözləmirdi. Həmişə irəlidə  gedirdi və hamını da arxasınca çəkib aparırdı. Onun zenit-raket qoşunlarının komandanı kimi ən böyük xidməti ölkənin HHM sistemində əsl istedadlı mühəndis və öz işinin ustası olması idi"

         1975-ci ildə  ordu sıralarından ehtiyata buraxılan   H. Rəsulbəyov elə həmin il Azərbaycanın rabitə naziri vəzifəsinə təyin olunur.

      Bu vəzifədə döyüş generalının bir sıra maraqlı idarəetmə xüsusiyyətləri özünü göstərir. O, insanlarla asanlıqla dil tapır, onların problemlərinə diqqət yetirir, hər bir işçinin daha da  yüksəlməsi üçün şərait yaradır, qayğı göstərir və  onların  yüksək vəzifələrə təyin edilmələri  naminə müvafiq strukturlara təqdimatlar göndərirdi.

       H.Rəsulbəyov  nazir işlədiyi müddət ərzində demək olar ki, rabitə işini tam olaraq yenidən qurdu, texnoloji  cəhətdən köhnəlmiş bütün avadanlıqlar yeniləndi, telefon-teleqraf rabitəsi keyfiyyətcə yeni mərhələyə qədəm qoydu. Şəhər və kəndlər telefonlaşdırıldı, beynəlxalq rabitənin inkişafı sahəsində yeni istiqamətlər müəyyənləşdirildi. Kadr məsələlərinə ciddi diqqət yetirildi, rabitəçilərin  sosial vəziyyəti xeyli  yaxşılaşdırıldı.

       Rabitə naziri vəzifəsində işləyərkən  o hərbidə olan iş üslubuna,  rəhbərlik prinsiplərinə sadiq qaldı.  1975-1980-ci  illərdə Bakıda şəhərlərarası iki telefon və teleqraf rabitəsi stansiyası tikilib istifadəyə verildi ki,  avadanlıqların hamısı keçmiş Yuqoslaviyadan gətirildi.Biraz sonra  Şirvan, Astara, Mingəçevir, Qusar və Xaçmaz rayonlarında şəhərlərarası avtomat telefon stansiyaları istifadəyə verildi.Və nəhayət, 1980-ci ildə respublikamızın şəhərlərində telefon şəbəkəsinin həcmi 1975-ci ilə nisbətən 1,4 dəfə artdı. Bütün bunlar H.Rəsulbəyovun nazir kimi böyük fəaliyyətinin yalnız bir hissəsi idi.

      Hüseyn Rəsulbəyov tarixi  baxımından az yaşadı, ömrünün 67-ci ilində -1984-cü ildə həyata vida etdi.  Hüseyn müəllim özündən sonra bir çox xeyirxah işlər, əməllər qoyub getdi. Onun şəxsi iştirakı ilə Baş Poçtamt, Rabitə Evi, rabitə qovşaqları və s.  layihələr işlənib hazırlanmış və inşa edildi. Artıq 20 ildən çoxdur ki, Azərbaycan Televiziyası və digər televiziyalar öz verlişlərini Dağüstü parkın yaxınlığında ucaldılmış müasir teleqüllə vasitəsi ilə bütün dünyaya yayır. Bu teleqüllənin ucaldılması isə Hüseyn Rəsulbəyovun adı ilə bağlıdır.

      Təəssüf ki, teleqüllənin işə düşməsini  görmək ona nəsib olmadı.Xoşbəxtlikdən  qədirbilən xalqımız daim şəhərimizə yaraşıq verən bu möhtəşəm qurğuya  baxdıqca, onu xatırlayır və inanırıq ki, bu minnətdarlıq və təşəkkür hissi  daim davam edəcəkdir.

       H.Rəsulbəyovun xidmətləri layiqincə qiymətləndirilmişdir. O, Lenin, II dərəcəli Vətən Müharibəsi, Qırmızı Ulduz, Qırmızı Əmək Bayrağı ordenləri və 14 medalla təltif edilmiş, ona "Azərbaycan SSR-in  əməkdar mühəndisi " fəxri adı verilmiş,  VII, VIII, IX və X çağırış Azərbaycan SSR Ali Sovetinin deputatı olmuşdur.

     Hazırda,  Dərbənd şəhərində həyata göz açdığı küçə və təhsil aldığı məktəbə xatirə lövhəsi vurulub. Şəhərin “Döyüş şöhrəti” Muzeyində igid generalın döyüş yolu ilə bağlı geniş ekspozisiya yaradılmış və   büstü qoyulub. Dərbəndin  abad,işıqlı   prospektlərdən biri   general-leytenant H.Rəsulbəyovun adını  daşıyır.

     Göründüyü kimi, Hüseyn Rəsulbəyov  bir çox xeyirxah işlər, əməllər qoyub dünyasını dəyişib,bu xeyirxah əməllər xalqımızın yaddaşında əbədi  yaşayacaqdır...

T.SƏDRƏDDİNOĞLU 

Faktinfo.az