Tacikistan Milli Kitabxanasında Azərbaycan Ədəbiyyatı Guşəsinin açılış mərasimi olub - FOTO

Faktinfo.az xəbər verir ki,tədbirdə Azərbaycanın mədəniyyət nazirinin müşaviri Oleq Əmirbəyov, Azərbaycan Milli Kitabxanasının direktoru Kərim Tahirov, Tacikistan Milli Kitabxanasının direktoru Farzalizada Cumaxon, eləcə də hər iki ölkənin nazirlik və Milli Kitabxana nümayəndələri, elmi-ictimai xadimlər və media mənsubları iştirak ediblər.

Tədbirdə AMEA-nın M.Füzuli adına Əlyazmalar İnstitutunun baş direktoru, akademik Teymur Kərimli, Tacikistan Yazıçılar Birliyi sədrinin müavini Ravşan Mahsumzod çıxış ediblər.

Mirzə Fətəli Axundov adına Azərbaycan Milli Kitabxanasının direktoru professor Kərim Tahirov Taciktan Milli Kitabxanası ilə əlaqələrin ildən-ilə genişləndiyini qeyd edib.

Bildirib ki, yeni yaradılan Azərbaycan Ədəbiyyatı guşəsində tacik oxucular Heydər Əliyev Fondu tərəfindən nəşr edilmiş, ölkəmizin tarixi, mədəniyyəti, ədəbiyyatı və müasir inkişafı, eləcə də 44 günlük Vətən müharibəsində şanlı Zəfərimizlə bağlı ətraflı məlumat almaq imkanı qazanacaqlar.

Qeyd edək ki, Mədəniyyət Günləri çərçivəsində artıq beşinci ölkədir ki, ən böyük kitabxanalarda Azərbaycan Ədəbiyyatı Guşəsi yaradılır.

Azərbaycan Ədəbiyyatı Guşəsinin açılması ölkənin görkəmli ədəbi-ictimai xadimlərinin əsərləri ilə xaricdə yaşayan azərbaycanlıların, həmçinin yerli vətəndaşların daha yaxından tanış olması üçün fürsət yaradır.

Guşədə oxuculara 250-dən artıq nəşr təqdim edilir. Burada Azərbaycanın tarixi, mədəniyyəti, ədəbiyyatı və müasir inkişafına dair nəşrlər yer alıb.

Çıxışlardan sonra tədbir iştirakçıları Azərbaycan guşəsində yer alan nəşrlərlə tanış olublar.

Faktinfo.az