Adı "BARMEK" olan qurum “Azərişıq” ASC-yə çevrildikdən sonra... 

Vaxtın uzanmasından faydalanmağa çalışan bəzi qüvvələr isə “Azərişıq”ASC-ni “ələ keçirmək” üçün bir-birilərilə mübarizə aparırlar.

Faktinfo.az bildirir ki,gizli savaş həddinə çatan bu mübarizədə  iddialılar arasında “SOCAR” təmsilçisinin də adı  keçir.Elə bu məsələyə diqqət çəkməyimiz də buradan qaynaqlanır.Çünki,belə bir halın gerçəkləşəcəyi  abonentlərə  xoş güzəran vəd etməyə bilər. Belə ki, rəhbərləri “SOCAR”a bağlı olan digər iki qurumun-“Azərsu” ilə “Azəriqaz”ın  fəaliyyəti göz önündədir.Hər həftənin bir günü paytaxt sakinlərinə verilən su və qaz səhərdən axşama kimi kəsilir.Adını da qoyurlar ki,profilaktik iş aparılır.Axı bu nə qədər olar? İlin-günün bu vaxtında paytaxtın müxtəlif rayonlarında  hər həftə suyun,qazın kəsilməsi nə deməkdir? Bu abonentlərin haqqını tapdalamaq,xəstəsi ,körpəsi,yaşlısı olan ailələrə zülm etmək deyilmi?

Belə bir şəraitdə “Azərişıq”ASC-nin rəhbərliyinə də “SOCAR” nümayəndəsi gətiriləcəksə ,onda vay bizim  halımıza...Qışın günü hər həftənin bir günü işıqsız  da qalmağın nə demək olduğunu təsəvvür etmək yəqin ki,çətin deyil.Bunu düşündükcə adamı indidən üşütmə tutur.

Qeyd edək ki,Baba Rzayevin “Azərişıq”ASC-nin sədri olarkən əhalinin fasiləsiz şəkildə elektrik enerjisi ilə təmin olunması üçün gördüyü işlər hər kəsə yaxşı məlumdur. Əvvəlki adı "Barmek" olan qurum “Azərişıq”ASC-yə çevrildikdən sonra bütün sistem ən yüksək səviyyədə yenidən quruldu və müxtəlif vaxtlarda bir neçə istisna halı nəzərə almasaq abonentlər fasiləsiz olaraq elektrik enerjisi ilə  təmin olunurlar.

Faktinfo.az olaraq hesab edirik ki,əhalinin mənafeyi naminə bu amil mütləq nəzərə alınmalıdır.Yoxsa ,hər həftənin bir günü suyun ,qazın  kəsilməsinə üçüncü bir problem- elektrik enerjisinin dayandırılması da əlavə olunarsa,ciddi çətinliklər meydana çıxa bilər. Vay o günə ki,qazın kəsilməsi ilə elektrik enerjisinin dayandırılması üst -üstə düşə. Batarıq... Təsəllimiz odur ki,qaz olmayanda heç olmasa  elektrik enerjisi ilə çay,yemək hazırlanır.

Elə bu səbəblərdən  yaxşı olar ki, ya “Azərenerji” ilə “Azərişıq”ASC birləşdirilsin(əvvəllər məhz belə idi), ya da qurumun özündən  layiqli bir kadr seçilərək “Azərişıq”ASC-yə rəhbər təyin edilsin.Belə olarsa,hər halda indiki real şərait qorunar,abonentlər də indiki kimi razı qalar. 

Firuddin Oruc

Faktinfo.az