Avropa Rusiya qazı ilə bağlı qəti qərarını verdi – 2027-ci ilə qədər idxalı tam dayandıracaq 

Avropa İttifaqının Moskvanın enerji asılılığından çıxmaq üçün atdığı ən ciddi addımlardan biri kimi qiymətləndirilir.

Avropa İttifaqı Şurasının məlumatına görə, spotsatışlar (öncədən müqaviləsiz alınan qaz) – 2026-cı ilin iyununa qədər dayandırılacaq, LNG üzrə uzunmüddətli müqavilələr isə 1 yanvar 2027-ci ildə başa çatacaq. Bundan başqa kəmərlə qaz tədarükü 30 sentyabr 2027-ci ilədək tamamilə bitəcək və 30 sentyabr 2027-dən sonra Aİ ölkələri Rusiyadan heç bir formada təbii qaz idxal etməyəcək.

Aİ-nin enerji komissarı Den Yurqensen bildirib ki, blok bundan sonra Rusiyanın enerji təzyiqlərinin və iqtisadi asılılığının aləti olmayacaq.

Xatırladaq ki, Avropa İttifaqı Rusiyadan qaz asılılığını 2022-ci ilin yazından – Kremlin Ukraynaya qarşı genişmiqyaslı hücumundan və Avropaya qaz axınını kəskin azaltmasından sonra azaltmağa başlayıb. Statistikaya görə 2022-ci ilədək Aİ-nin qaz idxalının 45%-i Rusiyanın payına düşürdü. Bu göstərici 2024-cü ilin oktyabrında 12%-ə qədər enib. Hazırda yalnız Fransa, Macarıstan və Belçika Rusiyadan qaz almaqda davam edir.

Rusiyanın Avropaya qaz ixracı 1968-ci ildə SSRİ-dən Avstriyaya ilk tədarükdən başlamışdı. Aİ-nin qərarı bu 56 illik enerji əməkdaşlığının faktiki sonu kimi qiymətləndirilir./Azpolitika.info