Azərbaycan hökuməti Şahvələd Çobanoğluna 6 min avro təzminat ödəyəcək – Avropa Məhkəməsi qərar verdi
Bu gün Avropa İnsan Hüquqları Məhkəməsi (AİHM) jurnalist Şahvələd Çobanoğlunun işi üzrə qərar verib. Qərara əsasən, Azərbaycan hökuməti jurnalistə təzminat ödəyəcək.
Məhkəmə işi jurnalist olan ərizəçinin ölkədən çıxışına rəsmi qurumların qadağa qoyması ilə bağlı idi. Ərizəçi Avropa İnsan Hüquqları Konvensiyasının 10 (fikri ifadə etmək azadlığı) və 18-ci (hüquqlarla bağlı məhdudiyyətlərdən istifadənin hədləri) maddələrinin pozuntusundan da şikayət etmişdi.
Hüquqşünas Xalid Ağəliyev bildirib ki, hökumət Ş.Çobanoğlunun effektiv müdafiə vasitələrinə malik olmaq və hərəkət azadlığı hüququna müdaxilənin baş verdiyini etiraf edib, ərizəçiyə 6 min avro təzminatın ödənilməsini və işin baxılacaq ərizələrin siyahısından çıxarılmasını təklif edib.
Ş.Çobanoğlunun ölkədən çıxışına Baş Prokurorluq 2014-cü ildən məhdudiyyət qoymuşdu. Jurnalist bildirmişdi ki, bu onun peşə fəaliyyəti ilə bağlı olub. 2020-ci ildə onun ölkədən çıxışına qadağa götürülmüşdü.
Bu xəbər üçün şərh yazın