Benzindən şikayət edənləri tuturlar - Videomüraciət hazırlayanlara cinayət işi açılıb 

Rusiyada benzin qıtlığından şikayətlər durmadan artır. Yanacaq böhranı ilə bacarmayan hakimiyyət isə şikayətlərin qarşısını güc yolu ilə almağa başlayıb.

Rusiyanın Volqoqrad şəhərində polis Rusiya İstintaq Komitəsinin sədri Aleksandr Bastrıkinə videomüraciət yazan beş yerli sakini saxlayıb.

Bu barədə Rusiya mediasında məlumat yayılıb.

Onlar yerli məmurların öz avtomobillərini məhdudiyyətsiz şəkildə benzinlə doldurmasından, adi vətəndaşlara isə yanacaq verilməməsindən şikayət ediblər.

Saxlanılanlardan biri mediaya bildirib ki, hadisə iyulun 16-da Rokossovski küçəsindəki yanacaqdoldurma məntəqəsinin yaxınlığında baş verib.

Daxili İşlər Nazirliyinin Volqoqrad vilayəti Baş İdarəsi beş iştirakçıya qarşı Rusiya İnzibati Xətalar Məcəlləsinin 20.2-ci maddəsi ("Yığıncaq, mitinq, nümayiş, yürüş və ya piketin təşkili və ya keçirilməsi qaydalarının pozulması") ilə inzibati qaydada ittihamlar irəli sürüldüyünü təsdiqləyib.

Saxlanılanlardan biri, vəkil Aleksey Sevastyanov isə Rusiya İnzibati Xətalar Məcəlləsinin 19.3-cü maddəsi ("Polis əməkdaşının qanuni əmrinə tabe olmama") ilə ittiham olunub. Volqoqrad Mərkəzi Rayon Məhkəməsi onu beş günlük inzibati həbs cəzasına məhkum edib.

Vəkil məhkəmənin qərarından apelyasiya şikayəti vermək niyyətində olduğunu bildirib. "Hesab edirəm ki, video mesajların yazılması üçün hansısa administrasiyanın icazəsinin tələb olunduğunu iddia edərək insanları qorxutmaq sadəcə dəlilikdir", - deyə o bildirib.

Volqoqraddakı həbslər Rusiyanı bürüyən böyük yanacaq böhranı fonunda baş verib. “Reuters” mənbələrinə görə, Ukraynanın pilotsuz təyyarələrinin hücumlarından sonra Rusiya öz neft emalı gücünün təxminən 40%-ni itirib.

Rəsmi olaraq, 40-dan çox bölgədə yanacaq satışına məhdudiyyətlər tətbiq edilib. Lakin, əslində, Rusiyanın demək olar ki, bütün bölgələrində, eləcə də Ukraynanın işğal olunmuş ərazilərində məhdudiyyətlər mövcuddur./Azpolitika.info