“Diqlas”ın yanmasına səbəb kənarda qanunsuz inşa olunan dönərxanadır- Nazir icra başçısını ittiham etdi
“Hadisədən dərhal sonra operativ olaraq yanğınsöndürənlər hadisə yerinə gəlib və ilkin tədbirlər həyata keçirilib”.
Faktinfo.az xəbər verir ki,bunu fövqəladə hallar naziri, general-polkovnik Kəmaləddin Heydərov Bakının Nizami rayonundakı “Diqlas” Ticarət Mərkəzində baş vermiş yanğınla əlaqədar Prezident İlham Əliyevin sədrliyi ilə bu gün keçirilən müşavirədə söyləyib.
Nazir deyib ki, yanğının mənbəyi ticarət mərkəzindən kənarda yerləşən və qanunsuz inşa olunan dönərxanadır: “Yanğının başvermə anı Daxili İşlər Nazirliyinin müşahidə kameralarında əks olunub. Yanğının söndürülməsinə 35 yanğınsöndürən maşın və 3 helikopter cəlb olunub. Ticarət mərkəzində yanğın təhlükəsizliyi qaydalarına indiyə qədər əməl olunmayıb. Fövqəladə Hallar Nazirliyi tərəfindən 2015-ci ildən başlayaraq “Diqlas” ticarət mərkəzi və Nizami rayon İcra Hakimiyyətinə müvafiq müraciətlərin olunmasına baxmayaraq, ticarət mərkəzində yanğın təhlükəsizliyi və digər təhlükəsizlik tədbirləri görülməyib, bu məqsədlə tələb edilən hidrantlar qoyulmayıb. Malların anbarlarda düzgün yerləşdirilməməsi və binanın alkoponla üzlənməsi yanğının daha da şiddətlənməsinə səbəb olub".
K. Heydərov qeyd edib ki, yanğının fəsadlarının aradan qaldırılması və ətraf binalara keçməməsi üçün bütün lazımi tədbirlər operativ qaydada həyata keçirilib: “Hadisənin başvermə səbəblərinin araşdırılması üçün qanunvericiliyə uyğun zəruri tədbirlər görüləcək və əldə olunan ilkin materiallar komissiyaya təqdim ediləcək”.
Bu xəbər üçün şərh yazın