Milli Kitabxanada “Əməkdar incəsənət xadimi Əliqismət Lalayev” adlı ənənəvi və “Əliqismət Lalayev - 70” adlı virtual sərgi istifadəçilərə təqdim olunub 

Faktinfo.az xəbər verir ki,4 iyul 2026-cı il tarixində Milli Kitabxanada Əməkdar incəsənət xadimi, sənətşünaslıq üzrə fəlsəfə doktoru Əliqismət Lalayevin 70 illik yubileyinə həsr olunmuş “Əliqismət Lalayev - 70”  adlı virtual və “Əməkdar incəsənət xadimi Əliqismət Lalayev” adlı ənənəvi kitab sərgisi istifadəçilərə təqdim olunub.

Sərgilərdə Əməkdar incəsənət xadimi, teatrşünas Əliqismət Lalayevin həyat və yaradıcılığından, Cəlil Məmmədquluzadə adına Naxçıvan Dövlət Musiqili Dram Teatrındakı fəaliyyətindən, səhnədə canlandırdığı obrazlardan, quruluş verdiyi tamaşalardan, teatr mühitinə gətirdiyi yeniliklərdən, qazandığı uğurlardan bəhs edilən ədəbiyyatlar, dövri mətbuatda və məcmuələrdə çıxan məqalələr nümayiş olunur.

Virtual sərgi ilə tanış olmaq istəyənlər https://anl.az/el/vsb/Eliqismet_Lalayev/index.htm linkindən istifadə edə bilərlər.

Əliqismət Hümmət oğlu Lalayev 1956-cı il iyul ayının 4-də Salyan rayonunda anadan olub. Əmək fəaliyyətinə 1972-ci ildə başlayan Əliqismət Lalayev ilk müstəqil addımlarını mədəniyyət sahəsində alıb, əvvəl klub müdiri işləyib, daha sonra isə Salyan rayon "Qələbə" qəzetində korrektor vəzifəsində çalışıb.

O, 1975-1980-ci ilərdəi Azərbaycan Dövlət İncəsənət İnstitutunun rejissorluq fakultəsinə daxil olub. İnstitutu fərqlənmə diplomu ilə bitirərək, Azərbaycan Respublikası Mədəniyyət Nazirliyinin xüsusi təyinatı ilə Naxçıvan Muxtar Respublikasına göndərilib, 1988-ci ilədək Naxçıvan Dövlət Musiqili Dram Teatrında rejissor kimi fəaliyyətini davam etdirib.

1993-cü ilin sentyabrından M. Maqomayev adına Azərbaycan Dövlət Filarmoniyasının direktor müavini vəzifəsinə dəvət olunan Əliqismət Lalayev sonralar Azərbaycan Respublikası Mədəniyyət Nazirliyində daha məsul vəzifələrdə çalışıb. Əliqismət Lalayev 2008-2025- ci illər ərzində Dövlət Musiqili Komediya Teatrının direktoru vəzifəsini icra edib.

O, Azərbaycan Jurnalistlər Birliyi, Azərbaycan Teatr Xadimləri İttifaqı və Azərbaycan Respublikası Kinematoqrafçılar İttifaqının üzvüdür. Əliqismət Lalayev Dünya Azərbaycanlıları Mədəniyyət Mərkəzinin Mədəniyyət və İncəsənət departmentinin direktoru, Türk Dünyası Ağsaqalları Birliyi İdarə Heyətinin üzvüdür. Sənətşünaslıq üzrə fəlsəfə doktoru, dosentdir.

Milli mədəniyyətimizin inkişafında xidmətlərinə görə Naxçıvan MR-nın Əməkdar İncəsənət xadimi (1986),  Azərbaycan Respublikasının Əməkdar incəsənət xadimi (2016), Azərbaycan Respublikası Mədəniyyət və Turizm Nazirliyinin "Fəxri mədəniyyət işçisi" (2016) fəxri adlarına layiq görülüb.

Teatr ictimaiyyəti tərəfindən böyük maraqla qarşılanan N.Qoqolun "Evlənmə" (2011) tamaşası və Ü.Hacıbəylinin "O olmasın bu olsun" komediyasına görə “Zirvə” mükafatına layiq görülüb.

Milli teatr sənəti sahəsindəki uğurlarına görə 2012-ci ilin may ayında "Yaxşıların yaxşısı" Milli Mükafatına layiq görülmüş Əliqismət Lalayev, teatrın vətənimizin hüdudlarından kənarda tanınması üçün də böyük layihələr həyata keçirib.

Faktinfo.az